• Angela Imgrüth
  • 9. Januar 2022

Ürhitparty im Jahr 2021

Nachbericht HIT 2021

Als ÜRHITPARTY wurde das Fest bekannt, wir vom OK haben es HITlerchilbi genannt.

Z`HIT isch ezz scho äs wili här, zrugg luägä faut ys gar nit schwär. Zwee scheeni Täg hemmer chennä gniässä und diä äintä hend am Sunntig dr Kater miässä biässä. Vo dr ganzä Schwiiz hemmer zämä gfundä, diä schlächt Lünä isch de bi aunä schnäu verschwundä. Zerst het z`Spiel ohne Gränzä gstartet, uf das hemmer aui gwartet. Ob bim Labyrinth, Skiparcour oder Harassä bigä, am Schluss het jedes Team wäuä sigä. Nach dä Spili sind diä äintä chli heiter wordä und yseri guätä Häufer hend ys ghulfä Pestä versorgä. Bim Üsklang wäred um Auphorä spilä, het dr Mättu sogar nu chennä ufs Handy schilä. Gässä hemer ohni Sorgä, ä hüüfä Herndli und Ghackets sind vernichtet wordä. Witergangä isches de speter, im Car vom HelikoPeter. Müsig hemer natirlich nur diä beschtä gha, z`Ländlertrio Ürnergrüäss het d`Tänzer nit im Stich glah. Kaffee isch ä hüüfä trunkä wordä, Nachschub hemer am Namittag scho miässä bsorgä. Abem 12ii het mä de chennä uf d`Tisch üfä stah, dr DJ Wisi und friends het Partymüsig abglah. A dem Abig hemmers richtig chennä lah krachä, am 3ii isch de aber d`Polizii cho Firabig machä. Dr Fuässmarsch wär i dem zuästand chli z`viu, drum het ys z`Taxi bracht azz Ziil. Angst het mä scho chli miässä ha, wiu gfahrä isch d`Angela. Bi dr Ubernachtig hemmer haut chli miässä sparä, das hend diä mäischtä säuber miässä erfahrä. Äs duät ys läid hender ä chli miässä frirä, drfir hender am Abig ader wärmi chenä fiirä. Nachem pfüsä, schnarchlä und chle meh, hemmer ys am Morgä bim Z`morgä wieder gseh. Ä grossä Hunger hend nit aui gha, diä äintä hend de z`Zmorgä bim Buffet lah stah. Frisch gstärcht oder ai nit, dr Sunntig het gstartet vom HIT. Steibisser wärdet miär Ürner «genannt», und fir diä beschtä Steibrächer isch GIPO bekannt. Ga ahluägä hemmer chennä ihrä Ladä, ubercho hemmer aui ä Schuggäladä. Z`Zmittagässä het scho uf ys gwartet, da hend de aui wider gstartet. Auplermagronä hemmer becho zum ässä, da drbiä hend ai diä letschtä ihrä Kater vergässä. Yserä OK-Präsidänt cha guät vor Liit eppis brichtä, drfir isch är nit grat dr Bescht bim Dichtä. Äs Gschänk hend de ihär ainu becho, mit Ürner Teigwarä und emnä Schlissuahänger sind de aui wieder drvo. Miär hoffet das ych ysers HIT i guäter Erinnerig wird blibä und das miär gli dent dr Coronavirus besigä. Scheen hend ihär bi ys z`Wuchänänd verbrungä, miär hend ä hüüfä glachet, tanzet und ai gsungä. Liäbi Griäss i diä ganz Schwiiz, ys wird mä wieder gseh das isch fiix. Ohni Ürner laift ä käi Party, das weiss sogar z`Fralein Marty.

I dem Bricht innä wettet miär ai nu a ysernä Häufer DANKÄ sägä, ihär sind besser gsi aus drii Tag Rägä.

Der Bricht isch nit so äifach gsi zum machä, aui hend sich wäuä trickä, das isch nit zum lachä. Diä äintä hend das glich nu wäuä richtä und hend de nu grat eppis afä Dichtä. Ai wen ihär vo yserem scheenä Diäläkt nit aues so guät chennet verstah, lents doch glich ä so lahstah.

Und jetzt nu d`Moral von der Geschicht, ä schlawä Bricht, der gibt es nicht.